Salwch a gludir gan fwyd (Gwenwyn bwyd)

Dolenni ar gyfer y gweithgareddau: fideo canfod y camgymeriadau, trefnu bwyd, a pa mor lân yw eich cegin.

Yn ôl Sefydliad Iechyd y Byd, mae salwch a gludir gan fwyd yn “salwch sydd fel arfer yn heintus neu’n wenwynig ei natur ac sydd wedi ei achosi gan facteria, firysau, parasitiaid neu sylweddau cemegol yn mynd i mewn i’r corff drwy fwyd neu ddŵr halogedig”. Mae’r mathau hyn o salwch yn effeithio ar oddeutu 23 miliwn o bobl drwy’r byd i gyd bob blwyddyn.

Yn y DU bob blwyddyn mae mwy na 500,000 o achosion o salwch a gludir gan fwyd sydd wedi eu hachosi gan ficrobau adnabyddedig. Mae’r rhan fwyaf o’r anhwylderau hyn yn y DU wedi eu hachosi gan ddofednod, ffrwythau a llysiau a bwyd môr halogedig.

Mae symptomau salwch a gludir gan fwyd yn cychwyn fel arfer o fewn ychydig o ddiwrnodau o fwyta’r bwyd a achosodd yr haint. Maen nhw fel arfer yn well o fewn wythnos a gallent gynnwys poenau stumog, dolur rhydd, chwydu, cyfog, blinder cyffredinol/poenau/oerfel a thwymyn. Ni fydd pawb yn cael y symptomau hyn, ond gallent gael eu trin gartref fel arfer.

Cliciwch yma i ddarllen cyngor y Gwasanaeth Iechyd Gwladol (GIG) ar reoli’r symptomau hyn ac o le i gael cymorth gan weithiwr proffesiynol gofal iechyd.

Bydd addysgu ac atgoffa plant o oedran ifanc i ddefnyddio’r prif arferion hylendid bwyd a hylendid y dwylo yn helpu i ostwng achosion ataliadwy o salwch a gludir gan fwyd.

Mae plant a phobl ifanc yn dysgu rheolau hylendid bwyd yn gyntaf yn y cartref gan eu rhieni, ac yn aml iawn maen nhw’n chwarae rôl wrth siopa, cario eitemau bwyd, storio bwyd, paratoi bwyd ac ailgynhesu bwydydd, ac wrth helpu i goginio i deulu a chyfeillion.